Ինչ պետք է իմանալ եկամտային հարկից օգտվելու մասին

Եկամտային հարկի վերադարձի շնորհիվ հազարավոր մարդիկ նոր բնակարան գնելու կամ տուն կառուցելու հնարավորություն ստացան, անշարժ գույքի առաջնային շուկայի զարգացումը նոր թափ ստացավ:

Հաշվի առնելով նորակառույցներում բնակարանների ձեռքբերման նկատմամբ պահպանվող պահանջարկը՝ եկամտային հարկի վերադարձից օգտվելու հնարավորությունը ներկայացնում ենք հարց ու պատասխանի տեսքով:

Ե՞րբ կարող եմ օգտվել եկամտային հարկի վերադարձից:

Եկամտային հարկի վերադարձից կարող եք օգտվել առաջնային շուկայից՝ անմիջապես կառուցապատողից անշարժ գույք՝ բնակարան, թաունհաուս, առանձնատուն ձեռքբերելու կամ կառուցելու դեպքում, եթե գույքի արժեքը չի գերազանցում 55 մլն ՀՀ դրամը:

Ի՞նչ չափով եկամտային հարկ կարող եմ հետ ստանալ:

Դուք կարող եք ստանալ առավելագույնը վճարվող տոկոսագումարի չափով եկամտային հարկ: Մյուս կողմից, հետ ստացվող եկամտահարկի գումարը չի կարող գերազանցել Ձեր վճարած եկամտային հարկի գումարը։ Այսինքն, եթե վճարում եք 100,000 ՀՀ դրամ եկամտահարկ, իսկ տոոկսագումարը 120,000 ՀՀ դրամ է, ապա հետ եք ստանալու 100,000 ՀՀ դրամ։ Իսկ եթե եկամտահարկը 120,000 ՀՀ դրամ է, իսկ տոկոսագումարը՝ 100,000 ՀՀ դրամ, կրկին ստանալու եք 100,000 ՀՀ դրամ։ Եռամսյակային վերադարձի գումարը կազմում է առավելագույնը 1,5 մլն ՀՀ դրամ, բայց ոչ ավելի, քան ամսական 500.000 ՀՀ դրամ:

Վճարվող տոկոսագումարի նվազմանը զուգահեռ պակասում է վերադարձվող եկամտային հարկը:

Անշարժ գույքը կարո՞ղ է գտնվել ցանկացած վայրում:

Այս պահին գումարի վերադարձից կարող եք օգտվել Երևանի՝ երրորդից բարձր գոտիներում, ինչպես նաև մարզերում գույքի ձեռքբերման/կառուցման դեպքում:

Նախատեսվում է, որ Երևանում օրենքը կդադարի գործել 2025թ-ի սկզբին:

Ի՞նչ փաստաթղթեր է անհրաժեշտ ներկայացնել Հարկային մարմին:

Եկամտային հարկի վերադարձից օգտվելու համար Հարկային մարմին պետք է ներկայացնել մի շարք փաստաթղթեր՝ այդ թվում հիփոթեքի պայմանագրի և ժամանակացույցի բնօրինակ, սեփականության իրավունքի գրանցման պետական վկայական, անձը հաստատող փաստաթուղթ և այլն:

Առավել մանրամասն տեղեկատվություն Ձեզ կարող են տրամադրել ՊԵԿ-ում:

Ի՞նչ պետք է անել պատասխանը ստանալուց հետո:

Ձեր դիմումի պատասխանը ստանում եք այն էլ. հասցեին, որը նշել եք դիմումի մեջ: Հաստատման դեպքում ստանում եք հղում դեպի էջ, որտեղ յուրաքանչյուր եռամսյակի վերջում դիմում եք ներկայացնում եկամտային հարկի վերադարձից օգտվելու համար:

Աղբյուրը՝ ttps://news.am/